Është ndarë nga jeta në moshën 69-vjeçare burrnesha Diana Rakipi, mjaft e njohur në vitet e fundit përmes medieve. Një atak kardiak i ka marrë jetën burrneshës, e cila u bë e njohur prej historisë së saj, teksa në Durrës, ku ajo jetonte, njihej edhe me pseudonimin “Lali”.
Edhe media të ndryshme ndërkombëtare ishin interesuar për të mësuar historinë e veçantë të jetës së Diana Rakipit, që e detyruar nga rrethana të ndryshme dhe nga zakonet e hershme shqiptare, por edhe për zgjedhje të saj, qe bërë burrneshë.
Ajo ishte shumë e njohur në Durrës dhe ishte një person shumë i dashur në këtë qytet. E moshuara qëndronte më së shumti me të rinjtë, të cilët e kishin pranuar ashtu siç ishte dhe kalonin kohë me të, si dhe e ndihmonin sa herë kishte nevojë. Diana ishe vetëm një prej burrneshave në Shqipëri.
Ajo ishte një dëshmi e gjallë e zakoneve të hershme shqiptare. Diana nuk krijoi dot një familje, por në intervistat e dhëna për mediat, tregon se nuk kishte pengje në jetë dhe se ishte krenare për zgjedhjen që kishte bërë. Ajo lindi në Tropojë.