Dy të rinj (vëllezër) janë arrestuar nga Policia e Tiranës, pasi kanë bërë kallëzim të rremë për vjedhjen e mjetit të tyre, me qëllim përfitimin e siguracionit.
Blutë e kryqytetit bëjnë me dije se dy vëllezërit, Selim Gashi dhe Benet Gashi, përkatësisht 27 dhe 21 vjeç, banues në Finlandë bënë kallëzim të rremë për vjedhjen e automjetit të tyre BMW X6, të cilin e kanë shitur tek dy shtetas të tjerë.
Policia ka sekustruar gjithashtu dhe një shumë parash prej 6800 eurosh, si dhe pjesët e automjetit.
Njoftimi i Policisë:
Kamzë
Finalizohet nga Komisariati i Policisë Nr. 5, operacioni policor i koduar “Insurance”. Shitën automjetin e tyre në Kamzë dhe bënë kallëzim të rremë për vjedhjen e tij, me qëllim përfitimin e siguracionit, vihen në pranga dy vëllezër kosovarë. Procedohen penalisht dy të tjerë. Gjatë operacionit janë sekuestruar 6800 euro dhe pjesët e automjetit BMË X6.
Ndërkohë vijon puna intensive për zbardhjen dhe dokumentimin e ngjarjeve të tjera të ndodhura, të kësaj natyre kriminale. Specialistët për Hetimin e Krimeve të Komisariatit të Policisë Nr. 5, në vijim të punës për goditjen e paligjshmërisë në çdo formë të saj, pas kallëzimit të marrë nga dy shtetas, për vjedhjen e automjetit të tyre, menjëherë kanë organizuar punën dhe kanë finalizuar operacionin policor të koduar “Insurance”.
Si rezultat i tij u bë arrestimi në flagrancë i shtetasve S. G., 27 vjeç, dhe B. G., 21 vjeç, të banues në Finlandë. Gjithashtu u proceduan penalisht shtetasit V. K., 49 vjeç, dhe I. K., 24 vjeç, të dy banues në Kavajë. Dy vëllezërit (S. G., dhe B. G.) kanë bërë kallëzim të rremë për vjedhjen e automjetit të tyre BMË X6, të cilin e kanë shitur te shtetasit V. K., dhe I. K., me qëllim përfitimin e siguracionit të automjetit. Në cilësinë e provës materiale u sekuestruan 6800 euro dhe pjesët e automjetit që janë gjetur në një pikë shitjesh automjetesh, në Kavajë. Materialet i kaluan Prokurorisë, për veprime të mëtejshme procedurale.