Policia e Shtetit ka ndaluar mëngjesin e kësaj të hëne Erik Fullanin, djalin e ish-guvernatorit të Bankës së Shqipërisë, Ardian Fullani.
29-vjeçari u ndalua teksa lëvizste me automjetin e tij në zonën e ish-Bllokut, për shkak të xhamave të errësuar. Por gjatë kontrollit fizik atij iu gjetë një armë tip pistoletë, të cilën pas verifikimeve dhe shoqërimit në komisariat rezultoi se e dispononte me leje.
“Ditën e sotme, rreth orës 10:45, shërbimet e Policisë kanë ndaluar për kontroll, në zonën e ish-Bllokut, automjetin me xhama të errësuar, me drejtues shtetasin E. F., 29 vjeç. Këtij shtetasi i është vendosur masa administrative 20 000 lekë të rinj, për xhamat e errësuar të automjetit.
Gjatë kontrollit fizik, shërbimet e Policisë i kanë gjetur një armë zjarri pistoletë 29-vjeçarit dhe për këtë arsye ai është shoqëruar në Komisariat, për verifikime të mëtejshme.
Pas verifikimeve ka rezultuar se arma që ai mbante ishte me leje dhe në vijim të veprimeve u bë njoftimi dhe dorëzimi i armës te drejtuesi teknik i firmës, ku ai punon (bodyguard), sipas procedurave përkatëse”, thuhet në njoftimin e policisë.