Qyteti i Lezhës është zgjuar mëngjesin e kësaj të shtune me disa fletushka të shpërndara në pika të ndryshme, me një parullë që shigjeton kryebashkiakun socialist Pjerin Ndreu. Ky i fundit është në mandatin e tij të dytë në krye të Lezhës.
“A komunikon kryetari i bashkisë në aplikacionin e vdekjes, SKY ECC?”, është mesazhi që përmban fletushka e ngjitur në një kabinë të ujësjellësit.
Një vit më parë autoritetet franceze njoftuan thyerjen e aplikacioneve sekrete të komunikimit të kriminelëve dhe politikanëve të lidhur me ta. Muaj më parë këto biseda i janë dërguar dhe SPAK në Shqipëri dhe shpesh është aluduar se në këto mesazhe dalin dhe shumë politikanë.
Kryebashkiaku Pjerin Ndreu e ka shpërndarë vetë një nga këto parulla dhe akuzon se ato janë shpërndarë nga kundërshtarët, për shkak të humbjes më 14 Maj.
“Meqe dike se ka zene gjumi mbreme, sepse nuk i del e keqja nga humbja, po i pergjigjem se nuk e njoh fare kete aplikacion e as kete lloj komunikimi! Jo vetem kaq por Kryetari i Bashkise megjithe deshiren e shumekujt, nuk eshte ulur kurre ne nje tavoline ku eshte folur per nje veper penale”, shkruan ai.
