Kombëtarja do të luajë një nga sfidat më të rëndësishme në këto kualifikuese të “EURO 2024”. Kuqezinjtë do të sfidojnë Çekinë në “Fortuna Arena” duke nisur nga ora 20:45. Një duel që do të vendosë për “kokën” e grupit, pasi dy ekipet në renditje i ndan vetëm 1 pikë, me çekët që udhëheqin me 7 të tilla.
Silvinjo mbrëmjen e djeshme ka dhënë edhe direktivat e fundit në Pragë, ndërsa ka skicuar edhe formacionin me të cilin do të zbresë në fushë për të tentuar 3 pikët. Braziliani do të luajë me skemën 4-3-3, ndërsa lojtarët që do hidhen në fushë janë të njëjtë si ndaj Ishujve Faroe.
Dilema më e madhe mbetet krahu i majtë i sulmit, ku ka një balotazh mes Taulant Seferit dhe Myrto Uzunit, por ish-i i Tiranës është më i avantazhuar për ta nisur nga minuta e parë.
Nuk ndryshon as qendra e mbrojtjes me dyshen Gjimshiti-Ismajli. Në mesfushë kishte jo pak dilema, por Silvinjo pritet t’i besojë të njëjtëve lojtarë si ndaj Ishujve Farore, Bajrami-Ramadani dhe Kristjan Asllani.
Nëse nuk ka ndryshime në momentet e fundit, edhe sulmi mbetet i njëjtë, i formuar nga treshja, Seferi, Cikalleshi dhe Jasir Asani. Ky është një perceptim i krijuar nga seancat e fundit stërvitore, por tekniku brazilian i kuqezinjve ka vërtetuar se në fund mund të ndryshojë, fundja trajneri ka në dispozicion një grup të plotë dhe me shumë cilësi.