A ka patur ndonjë rol SPAK-u në “Tempullin” e Rrumbullakut?

Drejtori i Përgjithshëm i Policisë, Muhamet Rrumbullaku, hipi në “Tempullin” e suksesit gjatë një konference mediatike të zhvilluar në 14 Shtator 2023, ku raportoi për arrestimin e mbi 230 personave që shpërndanin lëndë narkotike pranë shkollave.

Rezultati i një operacioni të gjerë, të zhvilluar në Tiranë dhe disa rrethe të tjera njëkohësisht, duket premtues.

Megjithëse efikasiteti i arrestimeve masive mbetet për t’u parë gjatë ecurisë së procesit në gjykatë, kreu i uniformave blu u shfaq para vartësve të tij dhe në krah të Ministrit të Brendshëm, Taulant Balla, duke folur me superlativa për atë që e konsideroi “super-operacion”.

Natyrisht, nuk la pa përmendur, disi shkarazi, bashkëpunimin me prokuroritë e rretheve, të cilët, sipas ligjit, udhëheqin hetimet. Por, ku ishin prokurorët? Në konferencën mediatike, nuk dukej asnjë përfaqësues i organit të Akuzës, as nga Tirana dhe as nga rrethet e tjera.

Policia e Shtetit, në “traditën e saj” aspak normale, ka përherë një qasje të tillë-kur ka suksese, është vetë në krye të punëve. Kur ka dështime, përgjegjësinë e përcjell tek prokurorët, si “zotër të hetimit”.

Operacioni “Tempulli” për arrestimin e “spaçiatorëve”-shpërndarësve të lëndës narkotike-u vlerësua si sukses dhe ndaj nuk duket se ka qenë e nevojshme prania e prokurorëve. Dafinat e fitores u duheshin vendosur mbi kokë punonjësve të policisë dhe askujt tjetër.

Ky lloj rivaliteti Polici-Prokurori për të marrë elozhet para reflektorëve të kamerave mediatike, e natyrisht për t’iu përcjellë edhe opinionit publik, thjesht është një “gangrenë”, e cila prej vitesh pengon bashkëpunimin e sinqertë mes institucioneve.

Nuk është një sjellje tipike dhe ekskluzive shqiptare. Edhe në vende të tjera, ky lloj rivaliteti për shoë ka qenë i pranishëm, derisa pikat janë vendosur mbi “i”, në funksion të luftës kundër kriminalitetit.

Vendet partnere që komunikojnë me autoritetet shqiptare, sidomos ato italiane, belge, hollandeze, gjermane, e të tjerë, kanë krijuar një model tejet efikas të prezantimit si duhet të rezultateve, i cili ka ndikuar edhe në bashkëpunimin mes tyre.

Hetimet zhvillohen nga prokurorët me bashkëpunimin e forcave policore. Rezultatet prezantohen në konferenca mediatike të drejtuara nga prokurorët, me pjesëmarrjen aktive të drejtuesve të forcave policore.

Një shembull i tillë konstatohet në konferencat mediatike të Strukturës së Posaçme Anti-Korrupsion (SPAK), e cila ka përfituar praktikat më të mira nga partnerët e huaj, jo vetëm në hetim, por edhe në prezantimin e rezultateve.

Në shumë operacione, sidomos me partnerët e huaj, SPAK-u ka zhvilluar konferenca mediatike me praninë e të gjithë aktorëve të përfshirë në veprimet hetimore.

Megjithëse në një sallë jo-shumë komode, prokurorët dhe përfaqësuesit e Policisë së Shtetit e, herë pas here, edhe zyrtarë të strukturave homologe, kanë qëndruar bashkërisht për t’i prezantuar opinionit konkluzionet e hetimeve. Është një praktikë e mirë, e cila minimizon një “rivalitet” pa lidhje mes institucioneve ligjzbatuese.

Por, për momentin, rezultatet e “Tempulli-t”, mesa duket, i duheshin vetëm drejtorit të Policisë, Rrumbullaku.

E, nëse ndodh që operacioni me 233 të arrestuar shfryhet në gjykatë për mungesë provash e faktesh, a do të dalë sërish Rrumbullaku në krye të “Tempullit” të dështimit?/BoldNews

Te rekomanduar

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu

Lexo mË tej