Emiliano Nina, kushëriri i të shmëkërkuarit Ervis Martinaj është vënë në pranga një ditë më parë.
Mësohet se Nina, i cili njihet edhe me mbiemrin Tasho është ndaluar në rrugën e Barrikadave, teksa udhëtonte si pasagjer në mjetin tip ‘Audi’ me ngjyrë të zezë.
Efektivët e forcave ‘Shqiponja’ i kanë bërë shenjë ndalimi drejtuesit të mjetit, i cili ka hapur krahun. Më pas, sipas procedurave të zakonshme ka nisur kontrolli. Drejtuesi i mjetit, Erison Lami ka rezultuar i ‘pastër’, ndërsa kushëriri i Martinajt ishte i shpallur në kërkim nga komisariati i policisë numër dy.
Ai është shoqëruar, por arsyeja për të cilën ishte shpallur në kërkim, nuk dihet ende.
27-vjeçari Emiliano Nina është një person me precedentë penalë dhe i njohur për autoritetet vendase.
Ai akuzohet si një nga autorët e vrasjes së Enton Nikës, ngjarje e ndodhur në Linzë, më 11 nëntor të vitit 2015, për para me fajde.
Nina mbërriti në Linzë, pranë lokalit me emrin ‘Muraga’, i shoqëruar nga kushëriri i tij Ervis Martinaj, Mirsad Kuçan dhe Bujar Hasani Lika (tashmë i ndjerë).
Të katërt kërkonin Ismet Gaxherrin, pronarin e lokal ‘Muragës’, i cili u kishte para borxh. Mes tyre ndërhyri dhe Enton Nika e në momentin që Nina qëlloi me armë zjarri e vrau 30-vjeçarin e plagosi Gaxherrin.
Dosja u mbyll dhe Nina u dënua, por problemet s’i la mënjanë.
Në vitin 2018, i riu që në atë kohë ishte 23 vjeç tronditi pushuesit në Dhërmi pasi qëlloi me armë zjarri në një klub natën. Ai qëlloi katër herë, por nuk la të lënduar. E gjithë ngjarja, sipas bluve në atë kohë, ndodhi pas një sherri mes Emilianos dhe një tjetër personi, për konflikte të hershme mes tyre.
Emiliano (Nina) Tasho është gjithashtu i përfshirë edhe në vjedhje. Më datë 30.09.2015 dhe më datë 12.03.2014, Nina marrë pjesë në dy vjedhje me armë zjarri. Njëra ishte grabitje në një supermarket.