Ish-deputeti i Partisë Demokratike Astrit Patozi tha në një intervistë për Euroneës Albania se imazhi i Edi Ramës është plotësisht i dëmtuar lidhur me skandalin McGonigal, por se ai nuk ka ende asnjë përgjegjësi ligjore lidhur me këtë çështje.
Sipas Patozit, fakti që qeverisë i dalin skandale të njëpasnjëshme edhe pse ka përballë një opozitë të përçarë tregon se ka ardhur koha për ndryshim radikal.
“Në një qeveri të korruptuar, edhe kur opozita nuk është e aftë, zullumet e qeverisë janë të mjaftueshme që ajo të bjerë me këmbët e veta, tregon se kjo është një qeveri për t’u ndërruar. Vendi ka nevojë për ndryshim radikal, por këtë nuk mund ta bëjnë kartat e djegura. Ne kemi njësoj të ekspozuar të 4 udhëheqësit legjendarë të 20 viteve të fundit: Rama, Basha, Meta, Berisha që kanë probleme të ngjashme në raport me SHBA”, tha Patozi.