Ka pasur përplasje në Kuvend mes ish-kryeministrit Sali Berisha dhe ministrit të drejtësisë Ulsi Manja, pasi demokrati akuzoi anëtarin e qeverisë se ka dekonspiruar aksionin e SPAK për arrestimin e Vangjush Dakos.
Berisha tha se Manja ka vënë në dijeni Dakon 4 ditë përpara se të bëhej arrestimi, ndërkohë që e akuzoi po ashtu ministrin e drejtësisë për krime elektorale të kryera në zgjedhjet e 14 Majit.
“Ke nxjerrë sekretin hetimor, ti e ke lajmëruar Vangjush Dakon 4 ditë përpara se të arrestohej, mos më ndërpre të lutem shumë. Ti je truproja e Edi Ramës, ja çfarë je ti, ke kryer një sërë krimesh elektorale, e kemi bërë gati dosjen edhe për ty”, ka akuzuar Berisha nga foltorja e Kuvendit.
Nga ana tjetër Manja tha se ai është i lumtur që drejtësia po funksionin, dhe paralajmëroi Berishën se shumë shpejt mund të jetë radha e tij për t’u përballur.
Ndërkohë që nuk ka munguar as replika e Manjës, i cili u shpreh: Nuk e di pse je shqetësuar Sali, se të shoh shumë të shqetësuar, zgjedhjet e 14 Majit mbaruan, të pres në 2025, sa për drejtësinë mezi e prita këtë ditë, që të dy të shkojmë para drejtësisë. Por jam i bindur që ti do të shkosh para meje, unë për këtë ditë të drejtësisë kam pritur.